Juni 12 2008

ORANJESTAD - E recien simposio di Fundacion Estudionan Social Cristian Aruba, FESCA a trata e topico di desaroyo economico di Aruba. E prome orador di e anochi y alabes e moderador, sr. Edward Erasmus, miembro di directiva di FESCA, a habri e anochi cu un discurso cu a toca e tema di e ‘rol di ciencia den politica y specificamente aki na Aruba’. Segun sr. Erasmus tin hopi opinionan tocante di e rol di ciencia of investigacion den poltica. Hopi biaha, nos ta imagina nos mes un cientifico den tur trankilidad ta compila y analysa datos cu e ta recauda y den un forma reflexivo ta purba determina resultado y conclusionan riba loke e la studia. Di otro banda ora papia di politica, e prome impresion cu tin bin den mente ta esun di e “tereno di bataya politico”, caminda politiconan, ambtenaarnan, gremionan y otro stakeholdernan ta topa otro den interaccion y debate continuo pa trata na convense otro ariba cua ta e mihor direccion pa solucion di problemanan den nos comunidad.

Un cos ta sigur, ora cu analysa e meta di e dos diciplinanan aki, ciencia y politica, no por keda sin constata cu cooperacion entre e dos diciplinanan aki por tin beneficionan mutuo pa cada uno di e diciplinanan. “Ciencia y politica no por ta completamente separa for di otro”, segun sr. Erasmus, pasobra nan tur dos tin un meta comun: “tur dos ta boga pa mehoracion den nos sociedad y tur dos ta enfoca riba anticipa y crea formulanan pa enfrenta retonan di futuro.” “Precisamente for di e punto di bista aki”, segun sr. Erasmus, “FESCA a wordo funda. “ Sr. Erasmus a sigui splica cu “ nos di FESCA a determina algun punto di salida importante”. E prome segun sr. Erasmus ta pa FESCA fungi como un compas moral, e di dos, ta objetividad y tambe ta pa stimula comunicacion y colaboracion.

Ariba e prome punto di salida, compas moral, sr. Erasmus ta referi na e hecho cu FESCA no unicamente ta haci analysis y constata, pero tambe ta pensa y studia solucionan factibel y funda. Consecuentemente e solucionan aki mester sirbi e politiconan manera un herment pa por tuma desicionan basa ariba hechonan.

E di dos punto di salida di FESCA ta objetividad. Sr. Erasmus a hasi un diferenciacion hopi cla aki banda: “nos ta tene debido cuenta cu un diferenciacion entre locual ta ‘politiek wenselijk’ y locual ta ‘wetenschppelijk waarneembaar’.” Aunke, segun e miembro di directiva di FESCA, e ‘politieke vraagstukken’ y programa di investigacion ta wordo prepara den dialogo cu liderazgo di partido AVP. E diseño, ehecucion y reportahe di estudionan, di otro banda, ta tuma lugar independientemente y liber di deseo – of opinionan politico.

Na final, sr. Erasmus a mustra ariba e comunicacion y colaboracion cu FESCA kier stimula pa medio di su estudionan. Cu esaki ta referi cu kier ta “den contacto continuo cu e comunidad, sea pa raporta nos estudionan, pero tambe pa keda al tanto di desaroyonan cu ta tumando lugar.” E simposium ariba su mesta un forma di comunica y comparti e resultadonan di un estudio grandi, dificil y holistico na pueblo di Aruba. Colaboracion ta referi na e hecho cu FESCA no ta hasi su trabou den un forma isola. Colaboracion den mundo cientifico ta algo sumamente importante y necesario. Esey mes ta e motibo cu FESCA a produci e ultimo estudionan aki den colaboracion cu “Het Wetenschappelijk Instituut” di Hulanda.

E discurso di sr. Erasmus a habri e anochi y alabes habri e podium pa e invitado di Het Wetenschappelijk Instituut, sr. Klaas Tuinstra, despues pa presidente di FESCA, sr. Richard Arends na final di e anochi, sr. Edwin Roos cu a duna un discurso hopi intresante ariba desaroyonan den nos economia.

Sr. Erasmus a sera su discurso recordando palabranan di un intelectual famosos, Leonardo Da Vinci: “Knowing is not enough; we must apply. Being willing is not enough; we must do.” Y ta percisamente esey ta loke ta bay juda FESCA crea e base pa ‘e vision’ pa e Aruba di futuro.

Bek Ariba