Juni 12 2008

ORANJESTAD - Un di e oradornan di e siposium di FESCA di siman pasa tabata sr. Klaas Tuinstra, cu ta consehero di Het Wetenschapelijk Instituut van het CDA (WI). Banda di e posicion aki den WI, e ta tambe consehero di Prome Minister Hulandes Jan Peter Balkenende y Minister Ab Klink.

Su discurso tabata enfoca ariba e trabounan di FESCA, e estudio titula “Desaroyo Economico di Aruba” y e necesidad di un partido politico pa tin un instituto manera FESCA y ideologia en general.

Sr. Tuinstra a cuminsa introduciendo e publico ariba e diferente fenomenonan di politica cu ta lantando cabes den den politica rond di mundo. Esakinan ta: Populismo, Cientalismo y Paternalismo. “Ningun di e fenomenonan negativo aki por tin algun beneficio pa un pais,” segun sr. Tuinstra y contrario na e fenomenonan aki, “ta existi corientenan politico cu kier mara e poder di e estado na e bienestar publico di e pais.” E consehero di WI ta sigui splica cu, “e ideologia politico ta duna e bienestar publico un color”. “E idea di un estado di derecho democratico ta,” segun Klaas Tuinstra, “cu partidonan politico ta duna bienestar publico e color cu ta pas na e ideologia politico”. Pesey mes conse partidonan cu ta bin di e banda liberal (rechts), Cristian Democratico (Center) y social democrata (links).

Hopi cos aki na Aruba (y rond di mundo) por wordo mira for di un punto di bista ideologico. Otronan ta hasi uso di entre otro populismo pa jega na poder, pero na final di dia ta faya den duna e pueblo loke e pueblo realmente mester. Sr. Tuinstra a duna algun ehempel, pero ehempel cu e la duna di manipula minimumloon, como un herment ad hoc pa maneha economia ta esun cu ta lanta mas preocupacion. Na Aruba e ultmo añanan a bin ta hunga cu BBO, hisamento di prijsnan pa servicionan di gobierno, invoerrechten y tambe minimumloon. Esaki tin awe cu nos economia no ta saludabel y consecuentemente prijsnan di productonan ta subi mas y mas y entrada for di e industria turistico ta baha. Y tur esaki a pasa prome cu e subida drastico di azeta internacionalmente di e ultimo aña. Awor e efecto lo ta simplemente peor.

Pa e motibonan aki ariba, sr. Tuinstra ta splica cu mester crea un manera mas eficas y serio pa politiconan por traha na beneficio di nan pais. Un titulo cu FESCA a usa den pasado pa un di su estudionan “Inzicht biedt uitzicht,” ta mustra con e mester. Pero e urgencia tambe mester ta algo cu mester bira mas evidente pa un y tur. Cu e raport “Desaroyo Economico di Aruba”, sr. Tuinstra ta kere cu a logra esaki. E investigacionan y analysis di FESCA a mustra cu tin un urgencia pa drecha di un manera structural y systematico e situacion economico di Aruba. Simplemente hisa salario minimo awo, despues introduci un BBO, pa despues bolbe hisa e salario minimo no ta traha. E maniobranan ad hoc aki ta djies hasi e situacion precario den nos economia peor,treciendo ainsa e inflacion nan nivelnan record.

Un pregunta cu sr. Tuinstra a hasi ta: “Kiko ta un partido politico sin un vision ariba e bienestar general di su pais?” Na Aruba y Hulanda partidonan politico ta hasi uso di institutonan cientifico pa crea un base for di cua nan por maneha nan vision. E institutonan aki ta para for di un distancia pa asina nan por studia desaroyonan (economico) basa ariba un periodo di mas di 4 aña largo. “Awe nochi”, segun sr. Tuinstra, refiriendo na e simposium di FESCA, “e estudio ta basa ariba un periodo te na 2020”.

Finalisando sr. Tuinstra a splica cu e estudio “Desaroyo Economico di Aruba”, ta unicamente e prome parti di un serie di estudionan, un “drieluik”, di Aruba. Prome cu e estudio aki, ja e dos institutonan FESCA y WI a colabora ariba e estudio di WI titula “Naar een Salsa op Klompen”. Prome cu final di e aña aki, segun sr. Tuinstra, e ultimo dos estudionan di e serie lo keda completa.

Pa esnan cu kier lesa mas di e estudio “Desaroyo Economico di Aruba” di FESCA: klik aki...

Bek Ariba