Juni 2 2008

A base di e nivel di prijs por wordo determina cu e diferencia di poder di compra entre e mercado Arubiano y esun Mericano for di aña 2000 a bira por lo menos 11% menos, cu kiermen cu e nivel di prijs halto di Aruba no por wordo traduci den un entrada mas grandi pa Aruba. Esaki ta un di e conclusionan di FESCA for di un estudio di desaroyo economico di Aruba cu lo wordo presenta dentro di poco.

FESCA, e instituto cientifico di partido AVP, cu colaboracion di “Wetenschappelijk Instituut voor het CDA” a prepara tres estudio cu lo trata e topiconan di economia, infrastructura y calidad bida na Aruba. E prome estudio for di e serie aki, di economia di Aruba, lo wordo presenta 5 di juni proximo. E dos otro estudionan lo wordo presenta mas despues den aña.

“E ta dificil pa determina e relacion entre poder di compra di e turista den su mercado y esun na Aruba na 2000. Loke ta sigur ta cu Aruba na aña 2000, tabata un destinacion atractivo a base di e nivel di prijs di e tempo aya”, segun FESCA. Por lo pronto ta mustra cu e turista no a adapta su presupuesto di vacacion na e nivel di prijs di Aruba. Esaki ta evidente for di e bahada den loke e turista ta gasta na Aruba y tambe e bahada den redimento di cambernan di hotel manera a wordo mustra pa Oficina Central di Estadistica. E inflacion na Aruba, compara cu aña 2000, ta 11% mas halto cu e mercado Americano. Maske cu e valor di nos moneda a baha di balor compara cu esun di e Euro na 2002, Aruba a keda toch 15% mas caro cu e nivel di prijsnan di aña 2000.

Aunke cu e nivel di prijs y e patronchi di comsumo di un turista cu ta biba leu no ta igual na esunan di un residente, e ta duna un indicacion si di e nivel di prijsnan. “Mas halto e nivel di prijs di Aruba ta, compara cu e partnernan economico di mas imporante, tin como consecuencia cu e turista tin menos recurso pa gasta”, segun FESCA. Despues di un subida den loke e turista ta gasta den e periodo di 2004 pa 2005, a sigui un bahada den volumen mes pisa den 2006. E placa cu e turista ta gasta na Aruba lo mester contribui na e crecemento di e entrada di Aruba (BBP). Figura 2 ta mustra di otro banda cu e contribucion di e turista na Aruba no ta cana hunto cu e BBP. For di 2000 a bin mas acomodacion aserca. E entrada average pa acomodacion no ta cana man den man cu e BBP; e entrada average pa cada acomodacion turistico ta 13% menos cu e crecemento di e BBP.

E aceleracion di inflacion desde 2007 lo keda algun aña mas vigente, pa motibo di adaptacion di salarionan. Esaki ta significa cu lo sigui un retraso den subida di gasto cu turistanan ta hasi na Aruba. E situacion ideal lo ta ora cu loke turistanan ta gasta na Aruba surpasa e crecemento di e cantidad di turistanan. E ultimo aki ta posibel atrayendo turistanan di un nivel di entrada mas halto. “Mas halto e nivel di entrada di un turista, menos influencia factornan externo tin ariba si nivel di gasto ta na cierto punto, manera subida di prijs di petroleo”, segun presidente di FESCA Arends. Disminucion di loke turistanan ta gasta ta confirma e bista general di un stagnacion den crecemento y bahada real di entrada pa cabes di e populacion pa motibo di imigracion. E crecemento economico limita no ta wordo carga tampoco pa un crecemento di turista.

E bahada den loke turistanan ta gasta na Aruba y tambe e bahada den entrada for di acomodacion di estadia ta wordo ocasiona entre otro pa un subida den prijs di petroleo, cu ta hasi un viahe den avion pa Aruba mas caro. Segun presidente di Banco Central Hulandes, e efectonan di e prijs di petroleo cu ta sigui subi lo ta mas peor cu 9/11. Mientras tanto un bari di petroleo ta costa caba mas di $130. For di cuminsamento di e aña aki, prijs di petroleo a subi casi 40%. Analistanan ta premira cu prijs di petroleo por jega $150 hopi liher. Tur esaki ta motibo pa delinja un vision pa futuro y pone Aruba den un direccion cu ta hasi Aruba directamente y indirectamente mas independiente di e factornan externo aki. For di 1980 caba a wordo mustra cu economianan chikito manera esun di Aruba mester crea un “buffer” pa baha e efecto cu e factornan externo aki por tin ariba nan. Aki ta na unda e trabou di un instituto cientifico manera FESCA ta. Segun presidente di FESCA Arends, Aruba a jega na e punto caminda cu e formula existente no ta provee un crecemento den e producto turistico pa sigui duna e poblacion e mesun entrada. E redescubrimento di Aruba ta central, den e consehonan di e prome di e tres estudionan di FESCA, e aña aki pa un mehoracion di e posicion di concurencia di Aruba.

Bek Ariba