Juni 3 2008

Den e lunanan cu a pasa e raportnan di IMF internacionalmente a wordo masha tanto mes critica dor di malcalculacionnan, manera por ehempel riba tereno di prijs di vivienda na Hulanda. E raportnan cu IMF a traha di Aruba a base di Articulo IV ta demasiado prometedor. E medionan cu IMF a propone pa yuda e crecemento economico no tabata eficaz. Esaki ta un di e conclusionnan di FESCA, e instituto cientifico di partido AVP cu, cu ayudo di e instituto cientifico di CDA, a haci tres estudio na Aruba, esta riba nos economia, infrastructura y calidad di bida. E prome di e serie aki riba economia di Aruba ta wordo presenta dia 5 di juni benidero.

Mescos cu otro actornan di afo IMF mas di un biaha a insisti pa mehora e sector turistico y e diversificación di nos economia pa yuda yega na un crecemento economico real. E conclusionnan di e raportnan di Articulo IV riba e periodo 2000-2007 ta duna muestra di un cierto cantidad di medionan con por haci e crecemento economico di Aruba stabil y duradero. Sin embargo, sin ningun resultado. Un maneho economico cu ta orienta riba crecemento, no di mes ta conduci na un crecemento economico. Restringi inflacion dor di un maneho monetario stringente maneha pa CBA no ta efectivo sin colaboración di gobierno cu ta keda usa fianzanan di afo pa cubri su defictnan. Ademas ta asina cu trata na atrae inversionnan publico y priva pa yuda e crecemento economico no ta posibel si e inversionnan publico no ta tuma lugar.

Segun FESCA e inversionnan hopi halto na 2005 adelanta den cuadro di e sector turistico no a conduci na un crecemento economico. “Gastonan haci dor di turistanan for di 2004 ta bahando y no ta conduci na crecemento di e BBP”, según e analisis. Den su ultimo raportahe IMF ta pone cu e gastonan abou di salarionan ta e base di e crecemento economico di Aruba. “Den e periodo 2000-2007 e desaroyo salarial den casi tur sector ta sigui e curso di inflacion te na e punto cu e espacio salarial responsabel a wordo surpasa. E chens cu Aruba despues di 2007 lo cai den un spiral di prijs di salario ta evidente y den ningun sentido ta bentahoso pa nos economia”, asina e presidente di FESCA Arends ta remarca.

“Na 2007 por concluí cu e crecemento economico dor di atrae inversionnan den cuadro di intensificacion di nos actual actividad nucleo economico no a conduci na e crecemento economico aki”, segun Arends.

Segun e raport di IMF, Aruba compara cu otro paisnan den e area Caribense tin e BBP mas halto per capita danki na e crecemento economico y e cifra abou di inflacion. FESCA tin su observacionnan necesario pa loke ta e conclusion aki di IMF. E crecemento economico di Aruba desde e ultimo consulta na 2001 a conoce un bahada anual, mientras cu e cifra di inflacion hustamente a subi den e periodo 2000-2003. Na 2003 e economia a crece un poco danki na e recuperacion chikito di e actividadnan turistico y dor di gastonan publico y particular. Na 2003 e nivel di prijs di Aruba compara cu Merca a wordo plantea cu segun un maneho monetario stringente mester wordo restringi. Apesar di esaki tog e no a conduci na un bahada di e nivel di prijs na Aruba den comparación cu e mercado di cosumo mas importante, esta Merca.

IMF ta conclui cu den cuadro di Articulo IV consultacionnan na 2007 cu e vulnerabilidad di e economia Arubano, a consecuencia di e dependencia fuerte di turismo y e posicion di debe cresciente di gobierno, ta keda igual. “Na 2005 IMF sinembargo ta enfatisa e importancia di un productividad di crecemento y labor. E crecemento di e poblacion, debi tambe dor di e binimento grandi di imigrantenan, no ta cana pareu cu e crecemento economico”, asina e raport ta mustra. Un poblacion laboralmente activo igual y un productividad negativo di labor finalmente lo conduci na un reduccion di nos economia na 2020. E analisis aki ta wordo comparti tanto dor di SER como FESCA.

Cu tur razon IMF ta señala den e periodo 2000-2007 cu hisa e productividad laboral ta esencial pa un crecemento economico. Pa motibo cu e crecemento di e poblacion ta mas grandi cu e crecemento economico por wordo conclui cu e ultimo aki no a wordo logra. Si e crecemento di e productividad laboral ta posibel bou di e circumstancianan na Aruba, esaki lo wordo demostra a base di e analisis laboral di e estudio aki.

Siguiendo e tendencia di e reaccionan riba e raport di IMF di e lunanan cu a pasa, e conclusion no por ta otro tampoco cu e medionan recomenda dor di IMF pa loke ta e crecemento economico no ta apto. “E descuido aki di parti di IMF posiblemente ta un resultado optimista di e gastonan turistico di CBA. Tambe e por ta dor di e caracternan diferente di e raportnan. E enfoque amplio di IMF tabatin un tardansa den percepcion como consecuencia cu den un forma continuo no por a yega na un crecemento economico”, asina e conclusionnan di e raport cu dia 5 di juni lo wordo presenta, ta señala.

Bek Ariba