Juli 30 2008

ORANJESTAD – Fundacion Estudionan Social Cristian Aruba, FESCA, a hasi entrega oficial di e estudio titula “Desaroyo Economico di Aruba” na Fundacion Instituto di Formacion Politico Digna Lacle Herrera. E estudio aki ta un analysis profundo di e situacion economico di Aruba. E intencion ta pa Fundacion Digna Lacle traduci e estudio aki den un cursonan destina pa amplia y mejora e forza humano di partidi AVP. E ultimo aki ta inclui e partido su instituto y fundacionan afilia, pero tambe tur esnan intresa den mejora y amplia nan conosimento ariba e areanan (incluyendo economia, educasion, asuntonan social, politica en general) cu e estudio aki ta acpara.

E estudio “Desaroyo Economico di Aruba” ta e prome parti di un serie di estudionan cu mester cubri henter e spectrum di desaroyo economico, structural y social di Aruba. Contrario na FESCA cu ta studia y analysa y investiga topiconan di interes pa partido AVP y comunidad en general, Fundacion Digna Lacle su tarea ta pa percura pa un formacion debido di esnan cu ta forma e partido na cua nan ta afilia y un y tur intresa den formacion politico en general.

Na nomber di FESCA, presidente di e fundacion, mr. drs. Richard Arends, a entrega mr. Luciano Milliard, presidente di Fundacion Digna Lacle, e estudio pa asina oficialmente cuminsa e proceso di traduccion di e estudio den cursonan. Ki dia e cursonan lo tuma lugar, segun sr. Milliard, ta dificil pa specifica ainda, pero nan fundacion lo cuminsa directamente cu e deliberacionan cu esnan cu lo bay ta encarga pa traha ariab dje. Si tur cos bay manera planea, e aña aki ainda e cursonan lo wordo completa pa presentacion na directiva di Fundacion Digna Lacle.

E raport di FESCA ta obtenibel pa download for di e website di FESCA: Click aki pa Download awor.

Bek Ariba