November 27 2008

Fundacion Estudionan Social Cristian, mihor conosi bou di e abreviacion FESCA, a organiza un symposium diamars anochi ultimo den collegezaal di E.P.I. E symposium a conta cu presencia di un cantidad grandi di intresandonan ariba e topico importante di Infrastrcutura. Manera ta bon conosi, un infrastructura di calidad eleva ta nesesario pa un desaroyo economico di calidad. Loke ta hasi nos infrastructura mas importante cu normal pa nos nos isla ta e hecho cu nos turismo ta rekeri un bon infrastructura den e sentido mas amplio di e palabra. E fondonan aki ta pa simulatneamente adelanta nos atrazo y inverti den e calidad di infrastructura pa bienester di e habitantenan di Aruba. Aki por pensa, banda di nos obranan publico, tambe ariba nos infrastructura di electricidad, awa, comunicacion y portuario (tanto aereo como maritimo).

E anochi a wordo habri pa miembro di directiva di FESCA, sr. Edward Erasmus cu a duna un introduccion cortico di e topico, con e anochi ta planea pa despues introduci e prome orador di e anochi, sr. Klaas Tuinstra, di “het Wetenschappelijk Instituut voor het CDA” (WI). E studio cu a wordo presenta e anochi aki ta parti di un projecto cu WI y FESCA a coopera estrechamente. Sr. Tuinstra a cuminsa dunando un relato riba e oportunidad nan cu e crisis mundial economico actual tin pa Aruba. E ta di opinion cu den momentonan di crisis, bo mester inverti. Sr. Tuinstra a bisa cu e credito cu no tin base real ta un di e causantenan mas grandi di e crisis economico. E ehempel cu Sr Tuinstra a duna tabata di un famia cu ta wordo ofreci un hipoteca mas amplio pa nan cas di locual esaki di berdad ta bal. E suma adicioanl ta hisa e entrada di e famia, te ora cu banco pidi’e back. Loke ta sosode den chikito ta sosode den grandi tambe, Sr. Tuinstra a conclui. Loke por pasa cu un famia ta pasa cu un gobierno tambe.

E siguiente orador tabata mr. drs. Richard Arends, cu ta presidente di FESCA. E la cuminsa pa duna un introduccion ariba e estudio. E la inicia pa bisa cu infrastructura mester di un ola di calidad urgente pa por ta na mesun nivel cu e actividadnan economico di anja 2020. Ademas e atrazo cu nos tin riba e tereno aki mester wordo adelanta. E estudio di FESCA a subraya e costonan halto di produccion y operacion di e diferente formanan di infrastructura. Inversionan por baha esakinan drasticamente. Obranan publico mas efectivo por resulta den ganashi economico y social pa e usuarionan. Rebaho den a gastonan operacional di waf, aereopuerto y telecomunicacion por hasi e producto Aruba mas atractivo. Den e sector di utilidad independencia di petroleo por reduci e gastonan di produccion.

E gastonan inecesariamente halto ta hasi e nivel di prijs di Aruba mas halto. Conclusion di e discurso di sr. Arends ta cu Aruba su infrastructura por ta den balanse cu e economia y den linja cu e vision pa anja 2020 si e recomendacionan wordo recomenda. Esaki lo tin un costo adicional di 1.7 biyon. Esaki sin conta inversionan reemplazante.

Na final di su exposicion, sr. Arends a jama dilanti representante di partido AVP y parlamentario di Staten di Aruba, sr. Benny Sevinger. Sr. Arends a presenta sr. Sevinger e studio “Infrastructura di Aruba”. Di su banda sr. Sevinger a bias di ta masha contento di por ricibi e studio aki, y a segura cu partido AVP lo studia y presenta e estudio aki na tur su organisacionan interno. Sr. Sevinger a sigui splica cu e tipo di trabounan aki di institutonan manera FESCA ta importante pa politiconan. Di e manera aki, politiconan no mester drenta crea un problema dor cu nan no a crea un conosimento di cierto topiconan prome cu nan actua.

E orador invitada di e anochi aki tabata ta sr. Leo Ponson cu ta un architect di profesion. Sr. Ponson a pone enfasis ariba e motibonan cu mester pone mas atencion ariba un bon infrastructura pa nos isla. Tambe sr. Ponson a expresa su preocupacion pa tiki atencion cu tin aki na Aruba pa nos naturalesa. Segun sr. Ponson tur esakinan no ta un question cosnan grandi cu mester hasi. Mester djis haci.

E anochi a clausura cu un panel di tur e oradornan di e anochi, caminda cu preguntanan di e publico a wordo contesta. Directiva di FESCA, a splica di ta masha contento con e symposium a bay y a anuncia caba cu e ultimo studio di e serie ta den pipe-line caba. Den e aña venidero ta spera cu e estudio aki por wordo presenta den un symposium. E estudio, “Infrastructura di Aruba” ta abotenibel den hard-copy, via di miembronan di directiva di FESCA pa f60.- pa copia. Por contactanan via info@fesca.org.

Pa download un copia (gratis), Click aki.

Bek Ariba